Blank

ОҚ АЛОМАТЛИ БИРДАМЛИККА ДАЪВАТ

Ўзбекистон Республикаси Конституциясининг 33-моддасига кўра, фуқаролар ўз ижтимоий
фаолликларини Ўзбекистон Республикаси қонунларига мувофиқ митинглар, йиғилишлар ва
намойишлар шаклида амалга ошириш ҳуқуқига эгадирлар. Мамлакатимиз мустақилликка
эришгандан кейин ўтган 15 йилдан ортиқ давр мобайнида ана шу ҳуқуқингиздан ҳеч
фойдаландингизми? Ёки ўзингиз, қариндош-уруғларингиз, ёр-у дўстларингиз ва, умуман,
халқингизнинг ҳаётидан шу даражада мамнунсиз-ки, митингга чиқиб, ҳукуматга баланд овоз
билан билдирадиган талабларингиз йўқми?
Агар, “кимдир ташқаридан келиб, ҳаётимизни яхшилаб беради, сабр қилиб турсак бўлгани”,
деб ўйлаётган бўлсангиз, қаттиқ адашасиз. Зеро, дунё меҳнаткашларининг машҳур
“Интернационал” гимнида ҳам “Бизга озодликни ҳеч ким – Худо ҳам, подшоҳ ҳам, бирорта
қаҳрамон ҳам олиб бермайди, ўз озодлигимизга ўз ҳаракатимиз билан эришамиз” дейилган.
Қопқонга тушишдан қўрққан сичқонга ўхшаб, овозимизни чиқармасдан бир бурчакда
ўтиришни бас қилиб, қандай йўл билан бўлишидан қатъи назар, ўзимизни намоён қилиш
пайти келди.
“Йиғламаган гўдакка онаси кўкрак тутмайди”, деб бежиз айтилмаган. Биз Ўзбекистон
ҳукуматининг айби билан ҳаётимизнинг барча соҳаларида вужудга келган аҳволни
ўзимизнинг норозилик чиқишларимиз билан танқид қилишимиз, шу йўл билан бизнинг
мандатимизни олиб, халқ номидан халқ манфаатларига қарши иш юритаётган
корчалонларга муносабатимизни билдиришимиз зарур.
Шуларни эътиборга олиб, “Бирдамлик” ҳаракатининг фаоллари 8 март Халқаро хотин-
қизлар байрами куни ўз конституциявий ҳуқуқларимизни амалга ошириб, норозилик
митинглари ўтказишни режалаштирганмиз.
Митингларда Ўзбекистон маҳбусхоналарида сақланаётган ҳуқуқ ҳимоячилари Мўътабар
Тожибоева, Гулбаҳор Тўраева ва Умида Ниёзоваларни озод қилиш талаб этилади. Бундан
ташқари, митингда ижтимоий кам таъминланган аёлларга давлат ғамхўрлигини ошириш
масаласига ҳам эътибор қаратилади.
Биз халқимизни ўтказиладиган митингларни зимдан бўлса ҳам қўллаб-қувватлашга ва тинч
йўл билан “оқ норозилик”ка қатнашишга даъват қиламиз. Бунинг учун, митинг
ўтказиладиган кун ва соатда ҳар қандай оқ рангли нарса – оқ плаш, оқ пальто, оқ либос, оқ
шапка, оқ шарф, оқ куртка, оқ кроссовка – мана шулардан ҳеч бўлмаса биттасини кийиб,
қуйида кўрсатилган шаҳарлардаги митинглар ўтказиладиган жойларга иложи борича яқин
келишингизни сўраймиз.
Митинглар ва “оқ норозилик” 8 март куни соат 10.00 дан 11.00 гача қуйидаги жойларда
ўтказилади:

Андижон шаҳри, Бобур майдони;
Бухоро шаҳри, Сетораи Моҳи Хосса атрофи;
Жиззах вилоят ҳокимияти биноси ёнига;
Марғилон шаҳар марказий майдони;
Қашқадарё вилоят ҳокимлиги биноси ёнига;
Шаҳрисабз шаҳар Амир Темир майдони;
Урганч шаҳридаги Авесто ёдгорлиги олдига;
Тошкент шаҳридаги Тўқимачилар саройи биноси олдига;
Самарқанд шаҳар Регистон майдонига.

Агар, юқоридаги кийимларни кийишга қўрқсангиз, ҳеч бўлмаса, чўнтагингиздаги
дастрўмолнинг, фарзандингизнинг қўлидаги қўғирчоқнинг ранги оқ бўлсин. Митинг
ўтказиладиган жойга келганингизда устида оқ ранг бўлган кишилар билан дардлашинг,
мамлакатда вужудга келган вазиятни ошкора муҳокама қилинг. Агар ҳуқуқни муҳофаза
қилиш органлари ходимлари сизни саволга тутса, митинг иштирокчиси эмаслигингизни, бу
ерга айланиб келганингизни айтинг.
Биз ўзимизнинг оқ ниятимизни шу тарзда ҳукуматга етказиб, ҳукуматнинг халқ билан
ҳисоблашиш ва талабларини бажаришга мажбур эканлигини яна бир марта эслатиб
қўяйлик.

Бирдамлик ҳаракати фаоллари.